Солонгон охин

Сормуусаа дэвж
Салхийг үүсгэдэг
Солонгон охины
Тольдох туяанд
Сар тодорч
Үсээ самнахад нь
Үүлс нүүдэг
Гэрэлтэгч өлмийгөөрөө
Гишгэсэн одод нь
Гялалзахдаа
Хотынхныг унтуулдаг
Ховор аялгууг
Дуугаргадаг
Сормуусаа дэвж
Салхийг үүсгэдэг
Солонгон охиныг
Уруулаа шилэмдэхэд нь
Уулсын орой чийгтэж
Энгэрээ сэгсэрэхийг нь
Энд бороо гэж нэрлэдэг.

2011,07,14

/Тэр охин ёстой үзэсгэлэнтэй, үүл нар хоёрын завсар амьдардгийн/