Хараацай

Надад нэг хараацай бий
Нарийхан салаа сүүлтэй
Хар биш цагаан далавчтай
Хачин...
Хараацай бий
Харанхуй болмогц л
Цээжин дотор ирээд нойрсдог юм
Харин нартайд тэр
Хажуугаар минь зөрсөн
Бүх сайхан сэтгэлтнүүдэд
"Хайр" гэдэг үгийг шивнэх гээд
Бүтэн өдөржин завгүй явдаг
Тэгээд л
Дэргэдүүр минь өнгөрсөн хүн бүр
Тэгтлээ инээмсэглээд байдаг байх
Алтан хошуутай хараацай минь
Аз жаргал минь илүүдэхээрээ
Агаарт дэгдэж үүл болдгийг
Олж мэдчихээд
Тийм их аз жаргалыг хүмүүст
Тарааж өгнө гэхээс
Тэслэгүй дээшээ нисээд
Үүлийг хошуугаараа хайчилсан гэнэ
Уут шиг үүлний
Урагдсаг завсраар нь аз жаргал
Очир алмаз шиг л асгарсан гэсэн
Тэгээд л эндхийн хүмүүс дээр
Тав хоног
Тасралтгүй бороо орсон байх даа...